Ulu Öndər Heydər Əliyevin siyasi mirasının müzəffər davamçısı


Azərbaycan xalqının tarixində elə şəxsiyyətlər vardır ki, onların gördüyü işlər, həyata keçirdiyi siyasət və dövlətçilik fəaliyyəti uzun illər xalqın yaddaşında yaşayır. Ulu Öndər Heydər Əliyev də Azərbaycan tarixində belə böyük şəxsiyyətlərdən biridir. Onun müəyyən etdiyi siyasi xətt, dövlətçilik prinsipləri və milli maraqlara əsaslanan siyasət bu gün də ölkəmizin inkişafında mühüm rol oynayır. Heydər Əliyevin ən böyük xidmətlərindən biri müstəqil Azərbaycan dövlətinin möhkəm təməllərini yaratması, ölkədə sabitliyin və inkişafın təmin olunması istiqamətində mühüm addımlar atması olmuşdur. O, Azərbaycanın gələcəyini düşünərək güclü dövlətçilik ənənələrinin formalaşmasına xüsusi diqqət yetirmişdir. Ulu Öndərin müəyyən etdiyi siyasi kurs bu gün Prezident İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə Azərbaycan son illərdə bütün sahələrdə mühüm nailiyyətlər əldə etmişdir. Ölkəmizin iqtisadi qüdrəti artmış, beynəlxalq mövqeyi möhkəmlənmiş, həyata keçirilən genişmiqyaslı layihələr Azərbaycanın inkişafına yeni imkanlar yaratmışdır. Bu siyasətin əsasını milli maraqların qorunması, xalqın rifahının yüksəldilməsi və dövlət müstəqilliyinin daha da gücləndirilməsi təşkil edir. Azərbaycanın son illərdə qazandığı ən böyük tarixi qələbələrdən biri də 44 günlük Vətən müharibəsində əldə etdiyi Zəfərdir. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu torpaqlarımızı işğaldan azad edərək xalqımıza böyük sevinc və qürur yaşatdı. Bu tarixi Qələbə Azərbaycan xalqının birliyini, ordumuzun gücünü və dövlətimizin siyasi iradəsini bütün dünyaya nümayiş etdirdi. Uzun illər ərzində həyata keçirilən məqsədyönlü siyasət, güclü ordu quruculuğu və milli həmrəylik bu Zəfərin əldə olunmasında mühüm rol oynadı. Ulu Öndər Heydər Əliyevin ən böyük arzularından biri Azərbaycanın ərazi bütövlüyünün və suverenliyinin bərpa edilməsi idi. Bu gün həmin arzunun reallığa çevrilməsi ölkəmizin tarixində yeni bir mərhələnin başlanğıcıdır. Qarabağ və Şərqi Zəngəzurda aparılan genişmiqyaslı bərpa və quruculuq işləri, doğma yurdlarına qayıdan insanların həyat şəraitinin yaxşılaşdırılması dövlətimizin qarşıya qoyduğu əsas vəzifələrdəndir. İlham Əliyevin həyata keçirdiyi siyasət yalnız hərbi və siyasi uğurlarla məhdudlaşmır. Regionların sosial-iqtisadi inkişafı, yeni yolların çəkilməsi, məktəblərin, xəstəxanaların tikilməsi, sahibkarlığın inkişafı və əhalinin məşğulluğunun artırılması istiqamətində görülən işlər də bu siyasətin mühüm tərkib hissəsidir. Xüsusilə regionların inkişafına göstərilən diqqət kənd və rayonlarda yaşayan insanların rifahının yüksəldilməsinə xidmət edir. Bu gün Azərbaycan beynəlxalq münasibətlər sistemində öz mövqeyi və söz sahibi olan dövlət kimi tanınır. Ölkəmizin müxtəlif beynəlxalq tədbirlərə ev sahibliyi etməsi, digər dövlətlərlə qarşılıqlı əməkdaşlığın genişləndirilməsi və milli maraqların qətiyyətlə müdafiə olunması Prezident İlham Əliyevin düşünülmüş xarici siyasətinin nəticəsidir. Mən hesab edirəm ki, Ulu Öndər Heydər Əliyevin siyasi irsinin davam etdirilməsi sadəcə onun müəyyən etdiyi siyasi kursun qorunması deyil, eyni zamanda bu irsin müasir dövrün tələblərinə uyğun şəkildə inkişaf etdirilməsidir. Bu baxımdan Prezident İlham Əliyevin fəaliyyəti Azərbaycanın dövlətçilik tarixində xüsusi əhəmiyyət daşıyır. Nəticə etibarilə, Heydər Əliyevin müəyyən etdiyi möhkəm təməllər üzərində inkişaf edən Azərbaycan bu gün daha güclü, daha müstəqil və beynəlxalq aləmdə daha nüfuzlu dövlətdir. Ulu Öndərin siyasi mirası xalqımız üçün böyük bir dəyər, Prezident İlham Əliyevin rəhbərliyi ilə əldə olunan nailiyyətlər isə həmin siyasi yolun davamlılığının göstəricisidir. Əminliklə demək olar ki, güclü dövlət, milli birlik və xalqın rifahı naminə həyata keçirilən bu siyasət Azərbaycanın gələcək inkişafında da mühüm rol oynayacaqdır.
Gülçin Calalova
YAP Şərur rayon təşkilatının fəal üzvü
Dərc vaxtına görə
Sesqazeti.azoxuduğunuz
Ulu Öndər Heydər Əliyevin siyasi mirasının müzəffər davamçısı