Yeni Azərbaycan Partiyası: inam və etimad ünvanı


1992-ci il noyabrın 21-də Azərbaycanın ictimai-siyasi həyatında mühüm tarixi hadisə baş verdi. Həmin gün Yeni Azərbaycan Partiyasının təsis konfransının keçirilməsi ölkənin gələcək siyasi inkişaf istiqamətlərinin müəyyənləşdirilməsi baxımından əlamətdar hadisəyə çevrildi. Müstəqilliyin ilk illərində ölkədə hökm sürən mürəkkəb siyasi şərait, idarəetmədəki böhran, dövlətçiliyin təhlükə altında olması və cəmiyyətdə sabitliyə yaranan ciddi ehtiyac yeni siyasi qüvvənin formalaşmasını zəruri edirdi. Belə bir tarixi şəraitdə xalqın böyük əksəriyyətinin etimad göstərdiyi Ümummilli Lider Heydər Əliyevin rəhbərliyi ilə Yeni Azərbaycan Partiyasının yaradılması milli siyasi tariximizin mühüm mərhələsini təşkil etdi. Yeni Azərbaycan Partiyasının yaranması təsadüfi siyasi təşəbbüs deyil, cəmiyyətin ictimai sifarişindən, xalqın sabitlik, güclü dövlətçilik və müstəqil inkişaf istəyindən irəli gələn tarixi qərar idi. Azərbaycanın müxtəlif bölgələrini təmsil edən ziyalıların, nüfuzlu şəxslərin və ictimaiyyət nümayəndələrinin bir araya gələrək Ulu Öndər Heydər Əliyevə müraciət etməsi həmin dövrün siyasi mənzərəsini aydın şəkildə ifadə edirdi. Tarixə “91-lər”in müraciəti kimi daxil olan bu hadisə ölkədə yeni siyasi mərhələnin başlanğıcına təkan verdi. Müraciətin arxasında dayanan əsas məqsəd Azərbaycanın dövlət müstəqilliyini qorumaq, ölkəni siyasi qarşıdurmadan xilas etmək, milli maraqları müdafiə edən güclü siyasi təşkilat yaratmaq idi. 21 noyabr 1992-ci ildə Naxçıvanda keçirilən təsis konfransında Yeni Azərbaycan Partiyasının yaradılması haqqında qərar qəbul edildi və Heydər Əliyev partiyanın sədri seçildi. Bununla da Azərbaycan siyasi həyatında öz ideoloji prinsipləri, təşkilati strukturu və aydın inkişaf strategiyası ilə seçilən yeni siyasi qüvvənin əsası qoyuldu. Partiyanın yaradılması, ilk növbədə, dövlətçilik məsuliyyətinin, siyasi uzaqgörənliyin və xalqın gələcəyə inamının təcəssümü idi. Bu qərar Azərbaycanın mürəkkəb dövrdən çıxaraq sabitlik və inkişaf yoluna qədəm qoymasında mühüm siyasi amilə çevrildi. Ulu Öndər Heydər Əliyevin siyasi təfəkkürü, zəngin dövlətçilik təcrübəsi və xalq qarşısındakı tarixi xidmətləri Yeni Azərbaycan Partiyasının ideoloji əsaslarını müəyyənləşdirdi. Partiyanın fəaliyyətinin mərkəzində Azərbaycan dövlətçiliyinin qorunması, milli maraqların müdafiəsi, müstəqilliyin möhkəmləndirilməsi və cəmiyyətin rifahının yüksəldilməsi kimi fundamental prinsiplər dayanırdı. Heydər Əliyevin “YAP dünənin, bu günün və gələcəyin partiyasıdır” fikri təşkilatın yalnız yarandığı dövrün siyasi ehtiyaclarına cavab vermədiyini, eyni zamanda, gələcək nəsillər üçün də mühüm siyasi və ideoloji dəyər daşıdığını ifadə edir. Yeni Azərbaycan Partiyasının tarixində ən mühüm mərhələlərdən biri onun hakim siyasi qüvvəyə çevrilməsi və ölkədə dövlət quruculuğu prosesinə fəal şəkildə qoşulması oldu. 1993-cü ildə Heydər Əliyevin xalqın tələbi ilə siyasi hakimiyyətə qayıdışı Azərbaycanın müasir tarixində dönüş nöqtəsi yaratdı. Ölkədə hökm sürən siyasi böhranın aradan qaldırılması, dövlət idarəçiliyinin möhkəmləndirilməsi, qanunçuluğun təmin olunması və ictimai-siyasi sabitliyin bərqərar edilməsi istiqamətində mühüm addımlar atıldı. Bu dövrdə Yeni Azərbaycan Partiyası dövlətçilik maraqlarının müdafiəsi və siyasi sabitliyin qorunması prosesində aparıcı qüvvələrdən biri kimi çıxış etdi. Ulu Öndərin rəhbərliyi ilə həyata keçirilən siyasət nəticəsində Azərbaycan müstəqil dövlət kimi öz inkişaf modelini formalaşdırmağa başladı. İqtisadi islahatların aparılması, beynəlxalq əlaqələrin genişləndirilməsi, enerji strategiyasının müəyyənləşdirilməsi, milli maraqlara əsaslanan xarici siyasətin həyata keçirilməsi ölkənin gələcək uğurlarının təməlini yaratdı. Yeni Azərbaycan Partiyası da bu strateji hədəflərin reallaşdırılmasında öz siyasi və təşkilati imkanları ilə iştirak etdi. Partiyanın fəaliyyətində dövlətçilik ənənələrinin qorunması ilə yanaşı, müasir çağırışlara uyğunlaşmaq və cəmiyyətin dəyişən tələblərinə cavab vermək əsas istiqamətlərdən birinə çevrildi. Bu gün Yeni Azərbaycan Partiyasının siyasi fəaliyyətindən bəhs edərkən onun keçdiyi tarixi yolu, əldə etdiyi nailiyyətləri və ölkənin inkişafına verdiyi töhfələri bir-birindən ayrı təsəvvür etmək mümkün deyil. Partiyanın ideoloji xəttinin əsasını təşkil edən güclü dövlət, milli birlik, siyasi sabitlik, iqtisadi inkişaf və müstəqil siyasət prinsipləri Azərbaycanın son onilliklərdə qazandığı uğurların mühüm siyasi dayaqlarından biri olmuşdur. Bu baxımdan YAP-ın fəaliyyəti yalnız siyasi təşkilatın fəaliyyəti deyil, həm də müasir Azərbaycan dövlətçiliyinin inkişaf mərhələləri ilə sıx bağlı olan tarixi prosesdir. Ulu Öndər Heydər Əliyevin müəyyən etdiyi siyasi kurs bu gün Prezident İlham Əliyev tərəfindən müasir dövrün tələblərinə uyğun şəkildə davam etdirilir. Dövlət başçısının rəhbərliyi ilə Azərbaycanın iqtisadi və siyasi qüdrətinin artırılması, beynəlxalq nüfuzunun möhkəmləndirilməsi, milli maraqların qətiyyətlə müdafiəsi və təhlükəsizlik imkanlarının genişləndirilməsi istiqamətində mühüm nailiyyətlər əldə olunub. İlham Əliyevin Yeni Azərbaycan Partiyasının VIII qurultayında səsləndirdiyi “Ulu Öndərin siyasi xətti dəyişməz olaraq qalır” fikri bu davamlılığın mahiyyətini aydın şəkildə ifadə edir. Burada söhbət təkcə siyasi ənənənin qorunmasından deyil, Azərbaycanın inkişafını təmin edən strateji prinsiplərin ardıcıl şəkildə həyata keçirilməsindən gedir. Prezident İlham Əliyevin rəhbərliyi ilə Azərbaycanın ərazi bütövlüyünün və suverenliyinin tam bərpa olunması ölkənin müasir tarixində ən möhtəşəm hadisələrdən biri kimi yadda qaldı. 2020-ci ildə Vətən müharibəsində qazanılan tarixi Qələbə, 2023-cü ildə həyata keçirilən antiterror tədbirləri nəticəsində dövlət suverenliyinin bütün ölkə ərazisində təmin edilməsi Azərbaycanın gücünü, siyasi iradəsini və hərbi qüdrətini nümayiş etdirdi. Bu hadisələr dövlətçilik tariximizin yeni mərhələsini formalaşdırmaqla yanaşı, Yeni Azərbaycan Partiyasının siyasi fəaliyyətinin həyata keçirildiyi ictimai-siyasi mühiti də əhəmiyyətli dərəcədə dəyişdirdi. Prezident İlham Əliyevin YAP-ın VIII qurultayındakı çıxışında vurğuladığı kimi, qurultay ilk dəfə Azərbaycanın ərazi bütövlüyünü və suverenliyini tam bərpa etməsindən sonra keçirilən mühüm siyasi tədbir idi. Bu reallıq partiyanın qarşısında yeni vəzifələr müəyyənləşdirirdi. Artıq Azərbaycanın əsas strateji hədəfləri sırasında azad edilmiş ərazilərin bərpası, Böyük Qayıdışın təmin edilməsi, regionda davamlı sülhün və təhlükəsizliyin möhkəmləndirilməsi, ölkənin beynəlxalq mövqelərinin daha da gücləndirilməsi dayanır. Belə bir şəraitdə Yeni Azərbaycan Partiyasının qəbul etdiyi proqramın müasir tendensiyaları və regionda yaranmış yeni reallıqları nəzərə alması xüsusi əhəmiyyət daşıyır. Dövlət başçısının “Ümummilli məsələlərdə heç bir fərqli fikir ola bilməz” fikri milli həmrəyliyin və ümumi məqsədlər naminə birliyin vacibliyini ifadə edir. Azərbaycanın qarşısında dayanan strateji vəzifələrin yerinə yetirilməsi siyasi baxışlardan asılı olmayaraq, dövlət maraqlarına hörmətlə yanaşmağı, milli məsələlərdə məsuliyyətli mövqe nümayiş etdirməyi tələb edir. Yeni Azərbaycan Partiyasının fəaliyyətində milli birlik və dövlətçilik prinsiplərinin ön plana çəkilməsi də bu baxımdan xüsusi əhəmiyyət kəsb edir. Partiyanın son illərdəki inkişafı onun təşkilati imkanlarının genişlənməsi, üzvlərinin sayının artması və cəmiyyətin müxtəlif təbəqələrini əhatə etməsi ilə müşayiət olunur. 769 811 üzvü olan Yeni Azərbaycan Partiyası geniş sosial bazaya, ölkənin bütün bölgələrində fəaliyyət göstərən təşkilati strukturlara və ictimai-siyasi proseslərdə iştirak imkanlarına malikdir. Bu göstərici partiyanın cəmiyyətdəki mövqeyini və təşkilati miqyasını ifadə etməklə yanaşı, onun qarşısında böyük məsuliyyət də yaradır. Xüsusilə gənclərin siyasi proseslərə cəlb olunması, qadınların ictimai fəallığının artırılması, intellektual potensialın dövlətçilik məqsədlərinə yönəldilməsi partiyanın fəaliyyətində mühüm istiqamətlərdəndir. Prezident İlham Əliyevin YAP-ın VIII qurultayında qeyd etdiyi kimi, ölkəmizin son illər ərzində uğurlu və şərəfli yolunda partiya fəallarının böyük payı və töhfəsi vardır. Bu fikir partiyanın fəaliyyətinin yalnız siyasi tədbirlər və təşkilati işlərlə məhdudlaşmadığını göstərir. Partiya fəalları dövlət siyasətinin ictimaiyyətə çatdırılmasında, vətəndaşlarla əlaqələrin möhkəmləndirilməsində, milli maraqların müdafiəsində və cəmiyyətin ictimai-siyasi həyatında fəal iştirak edirlər. Bu fəaliyyətin səmərəliliyi isə ilk növbədə, qarşıya qoyulan məqsədlərin düzgün müəyyənləşdirilməsindən və ictimai məsuliyyətin yüksək səviyyədə dərk olunmasından asılıdır. Yeni Azərbaycan Partiyasının qarşısında duran əsas vəzifələrdən biri də müasir dövrün çağırışlarına uyğun olaraq siyasi fəaliyyətin məzmununu zənginləşdirməkdir. İnformasiya texnologiyalarının sürətli inkişafı, qlobal siyasi və iqtisadi dəyişikliklər, yeni təhlükəsizlik çağırışları siyasi təşkilatlardan çevik yanaşma və müasir idarəçilik düşüncəsi tələb edir. Bu baxımdan partiyanın proqram və fəaliyyət istiqamətlərinin yenilənməsi, gənc nəslin təşəbbüslərinə geniş imkan yaradılması və ictimai dialoqun gücləndirilməsi mühüm əhəmiyyət daşıyır. Güclü siyasi təşkilat yalnız keçmiş nailiyyətləri ilə deyil, gələcəyin çağırışlarına verdiyi cavablarla da qiymətləndirilir. Bu gün Yeni Azərbaycan Partiyası 1992-ci ildə formalaşmış siyasi ideyanın zamanla genişlənərək böyük təşkilati və ictimai-siyasi qüvvəyə çevrilməsinin nümunəsidir. Onun keçdiyi yol Azərbaycan xalqının müstəqillik uğrunda mübarizəsi, dövlətçiliyin möhkəmləndirilməsi, milli maraqların müdafiəsi və tarixi Qələbənin əldə olunması ilə sıx bağlıdır. Partiyanın siyasi irsi Ulu Öndər Heydər Əliyevin müəyyən etdiyi dövlətçilik prinsiplərinə, Prezident İlham Əliyevin rəhbərliyi ilə həyata keçirilən müasir inkişaf strategiyasına əsaslanır. 21 noyabr 1992-ci ildə atılan tarixi addım bu gün də öz siyasi əhəmiyyətini qoruyur. Həmin gün yaradılan Yeni Azərbaycan Partiyası ötən müddət ərzində ölkənin ictimai-siyasi həyatında mühüm mövqe qazanaraq dövlətçilik tariximizin ayrılmaz hissəsinə çevrilib. Ulu Öndər Heydər Əliyevin siyasi uzaqgörənliyi ilə əsası qoyulan, Prezident İlham Əliyevin rəhbərliyi ilə müasir dövrün tələblərinə uyğun inkişaf edən bu siyasi təşkilatın əsas missiyası Azərbaycanın müstəqilliyinin, suverenliyinin, milli birliyinin və davamlı tərəqqisinin möhkəmləndirilməsinə xidmət etməkdir. Yeni Azərbaycan Partiyasının tarixi göstərir ki, düzgün müəyyənləşdirilmiş siyasi məqsəd, xalqın etimadı və dövlətçilik məsuliyyəti bir araya gəldikdə zamanın sınaqlarından keçən güclü siyasi irs formalaşır.
Nazimə Şamıyeva
YAP Füzuli rayon təşkilatının sədri
Dərc vaxtına görə
Sesqazeti.azoxuduğunuz
Yeni Azərbaycan Partiyası: inam və etimad ünvanı