Tereza Mey Britaniyanın Baş nazirinə Aİ ilə bağlı xəbərdarlıq etdi
.webp)
.webp)
BAKI, 22 noyabr. TELEQRAF
Böyük Britaniyanın sabiq baş naziri Tereza Mey ölkənin hazırkı Baş naziri Endi Bernemə Avropa İttifaqına (Aİ) qayıdış mövzusu ilə bağlı xəbərdarlıq edib.
Teleqraf xəbər verir ki, T.Mey bu barədə BBC-yə müsahibəsində bildirib.
O, E.Bernemin Aİ-yə qayıdışla bağlı danışıqlar barədə fikirlərini təəccüblə qarşıladığını deyib:
"Baş nazir olduğum dövrdə seçicilərin referendumdakı iradəsini yerinə yetirməli olduğumuzu açıq bildirirdim. İnsanlar "Breksit"ə səs veriblər və bu, artıq baş tutub. Sadəcə bunu qəbul edin və irəli gedin".
Sabiq hökumət başçısı E.Bernemi britaniyalıları Aİ ilə münasibətlər mövzusunda yenidən referendum keçirməyə razı salmağa çalışmaqda və seçicilərin əvvəlki səsvermədə səhv etdiklərini təlqin etməkdə günahlandırıb.
Qeyd edək ki, iki gün əvvəl baş tutan Böyük Britaniya – Aİ sammitindən sonra E.Bernem ittifaqla gələcək münasibətlərin qurulması variantlarını müzakirə etmək niyyətində olduğunu açıqlayıb. "The Times" qəzeti isə hökumət başçısının Britaniyanın Aİ-yə qayıtmalı olduğuna inandığını yazıb.
Xatırladaq ki, Böyük Britaniya 2016-cı il referendumunun nəticələrinə əsasən 2020-ci il fevralın 1-də Aİ-ni rəsmi olaraq tərk edib.