Malayziya KNDS-dən 36 ədəd 105LG yüngül topu almağa hazırlaşır


Malayziya 36 ədəd 105LG yüngül artilleriya sisteminin tədarükü ilə bağlı KNDS şirkətinə niyyət məktubu təqdim edib, danışıqların əsas mövzuları texnologiya transferi, yerli sənayenin iştirakı və inteqrasiya edilmiş atəşə nəzarət sisteminin quraşdırılması olacaq.
Ordu.az xəbər verir ki, Malayziya hökuməti Fransa prezidenti Emmanuel Makronun və Fransanın Silahlı Qüvvələr və Veteranlar məsələləri üzrə naziri Ketrin Votrenin Malayziyaya rəsmi səfəri zamanı KNDS şirkətinə 36 ədəd 105LG yüngül artilleriya sisteminin tədarükü ilə bağlı niyyət məktubu təqdim edib.
Bu hadisə Fransa ilə Malayziya arasında müdafiə imkanlarının və sənaye tərəfdaşlığının inkişafına dair yol xəritəsinin imzalanması ilə eyni dövrə təsadüf edib.
Malayziya Müdafiə Nazirliyi 2018-ci ildə 18 ədəd 105LG yüngül artilleriya sistemi, 2026-cı ilin iyununda isə 18 ədəd CAESAR artilleriya sistemi satın alıb. KNDS yeni niyyət məktubunun Malayziyanın şirkətin artilleriya sistemləri sahəsindəki təcrübəsinə etimadının davam etdiyini göstərdiyini və tərəflər arasında uzunmüddətli tərəfdaşlığı gücləndirdiyini bildirib.
Malayziya ordusunun 36 ədəd 105LG yüngül artilleriya sistemi əldə etməsinə yönəlmiş niyyət məktubu KNDS ilə Malayziya rəsmiləri arasında satınalma şərtləri, icra qaydaları və sənaye əməkdaşlığı mexanizmləri ilə bağlı danışıqların davam etdirilməsinə zəmin yaradır.
Danışıqlarda müqavilənin əhatə dairəsi, yerli sənayenin iştirakı, texnologiya transferi, yerli istehsal komponentlərinin payı və Sənaye Əməkdaşlığı Proqramının (ICP) həyata keçirilməsi kimi məsələlər müzakirə olunacaq. Bu fəaliyyətlərin Malayziyanın Milli Müdafiə Sənayesi Siyasətinin (NDIP) hədəflərinə töhfə verməsi nəzərdə tutulur.
Şirkət planlaşdırılan tədarük layihəsi vasitəsilə Malayziyanın artilleriya imkanlarını gücləndirməyi, ölkənin yerli müdafiə sənayesinin inkişafını dəstəkləməyi və yerli sənayenin texniki bilik və təcrübəsini artırmağı hədəfləyir.
KNDS ilə Malayziya arasında müdafiə sənayesi əməkdaşlığı 2018-ci ildə 18 ədəd 105LG yüngül yedəyə alınan topun sifariş edilməsi və yerli müəssisələrdə yığılması ilə strateji tərəfdaşlığa çevrilib. Bu proqram şirkətin müdafiə sənayesi layihələrində yerli tərəfdaşlarla həyata keçirdiyi əməkdaşlıq baxımından nümunə hesab olunur.
KNDS-nin Beynəlxalq Biznesin İnkişafı üzrə direktoru Amuri de Ponsen Malayziya ilə uzunmüddətli tərəfdaşlığı davam etdirməkdən və Malayziya ordusunun artilleriya imkanlarının inkişafına dəstək verməkdən qürur duyduqlarını bildirib. O, niyyət məktubunun imzalanmasının əməkdaşlıqda mühüm mərhələ olduğunu qeyd edib.
De Ponsen bu addımın KNDS-nin davamlı və müstəqil müdafiə imkanlarının yaradılması məqsədilə Malayziya rəsmiləri və yerli sənaye ilə birgə işləmək əzmini nümayiş etdirdiyini vurğulayıb.
Yüksək hərəkət qabiliyyətinə və qısa müddətdə mövqeyini dəyişmək imkanına malik 105LG yüngül artilleriya sistemi mürəkkəb əməliyyat şəraitində aşağı görünürlük və yüksək sağqalma qabiliyyəti təmin edir.
KNDS Malayziyadakı fəaliyyətlərini ölkənin aparıcı müdafiə sənayesi şirkətlərindən biri olan “Advance Defense System Sdn Bhd” (ADS) ilə əməkdaşlıq çərçivəsində həyata keçirir. 2005-ci ildə yaradılmış ADS Malayziya ordusunun artilleriya sistemlərinin inteqrasiyasında mühüm rol oynayır, həmçinin müdafiə sektorunda fəaliyyət göstərən beynəlxalq şirkətlərlə birgə layihələr həyata keçirir.
İlk 18 ədəd 105LG yüngül artilleriya sisteminin yığılmasını öz müəssisələrində həyata keçirən ADS-in planlaşdırılan 36 sistemin də inteqrasiya edilmiş atəşə nəzarət sistemi ilə birlikdə yerli şəraitdə yığılmasını öz üzərinə götürəcəyi bildirilir.
KNDS-nin Beynəlxalq Biznesin İnkişafı üzrə direktoru Amuri de Ponsen Malayziya ilə uzunmüddətli tərəfdaşlığın davam etdirilməsindən və ölkə ordusunun artilleriya imkanlarının inkişafına dəstək göstərilməsindən məmnunluq duyduqlarını bir daha vurğulayıb. O, niyyət məktubunun imzalanmasının əməkdaşlıqda mühüm mərhələ olduğunu və KNDS-nin davamlı, suveren müdafiə imkanlarının yaradılması üçün Malayziya rəsmiləri və yerli sənaye ilə birgə çalışmağa sadiqliyini göstərdiyini bildirib.
Sevinc Əliyeva Ordu.az