Genetik sensasiya: Azərbaycanın məşhur seyid nəsli gürcü mənşəli çıxdı


Ata nəsli Lerikin Xəlifəküçə kəndindən olan tanınmış seyid Xəlifə İbrahim nəslindən olan həmyerlimizin genetik analizi maraqlı nəticə verib. Belə ki, onun Y DNT testi J2 haploqrupunun Y48189 subkladına məxsus olduğunu göstərib. Bu subkladın 2700 il yaşı var, əsasən Gürcü (Kartvel) qolu sayılır.
Test personal tiplidir, IN78164 rəsmi elmi iş nömrəsi ilə layihənin bazasına daxil edilib.
Azərbaycan DNT layihəsi admini, genetik-tədqiqatçı və irsi xəstəliklər üzrə araşdırmaçı Orxan Xansuvarın verdiyi məlumata görə, YFull məlumat bazasındakı nümunələr bu xəttin tarixi olaraq Qafqaz regionunda cəmləşdiyini göstərir. Həmin subklad bu regionlarda qeydə alınıb: • Şimali Qafqaz. Osetinlər (Şimali Osetiya, Rusiya) və çeçenlər (Çeçenistan, Rusiya) arasında qeydə alınmışdır. • Cənubi Qafqaz. Gürcülər arasında (xüsusilə Raça-Leçxumi, Samtsxe-Cavaxeti və Kaxeti bölgələrində) rast gəlinir. • Digər regionlar. Nadir hallarda Qərbi Avropada (məsələn, Fransa) yaşayan nümunələrdə də müşahidə olunmuşdur.
Hazırda J-Y48189 subkladının ən çox müxtəlifliyi və alt budaqları (J-Y59287, J-Y50327 və s.) Gürcüstanda (xüsusilə Kaxeti, Raça və Cavaxeti bölgələrində) qeydə alınıb. Genetikada bir budağın hansı bölgədə daha çox şaxələnməsi onun məhz oradan yayıldığına dair güclü dəlil sayılır.
Bu subklad həmçinin Ərdəbil şəhərinin tanınmış Seyid Sabahi nəslində də aşkarlanıb. Onların Y25 markeri üzrə Xəlifəküçə seyidlərinə uyğunluğu var, yəni uzaq əmioğludurlar.
Bu nəslin nümayəndələri keçmişdə Lerikdən köç edərək Lənkəranın Osaküçə, Ləj və Havzava kəndlərində məskunlaşmışlar. Yəni, Osaküçə, Ləj və Havzava kəndinin seyidləri də məhz bu nəsildəndir.
Samir Quliyev
AzVision.az
1 mənbə