FED-dən süni intellekt investisiyaları ilə bağlı xəbərdarlıq: maliyyə sabitliyi risk altındadır


ABŞ Federal Ehtiyat Sistemi süni intellekt sektoruna yönələn böyük investisiyaların maliyyə bazarları üçün potensial risklər yarada biləcəyinə diqqət çəkib. Texnologiya şirkətlərinin yüksək qiymətləndirilməsi və bu sahəyə böyük kapital axını investorların davranışına təsir göstərir.
Plat.az-ın The Wall Street Journal-a istinadən xəbər verir ki, FED-in oktyabrın 27–28-də keçirilən iclasının protokollarında maliyyə sabitliyi ilə bağlı risklər müzakirə olunub. Tənzimləyici qurumun nümayəndələri süni intellekt sahəsinə yatırılan böyük vəsaitlərin iqtisadiyyatda yeni həssaslıqlar yarada biləcəyini qiymətləndiriblər. Xüsusilə texnologiya şirkətlərinin bazar dəyərinin sürətlə artması və investisiyaların gəlirliliyinə dair qeyri-müəyyənlik diqqət çəkib. Protokollarda maliyyə bazarlarında yüksək qiymətləndirmələrin və kredit risklərinin mümkün nəticələri də nəzərdən keçirilib. İclas iştirakçıları inflyasiya təzyiqləri və iqtisadi qeyri-müəyyənlik fonunda faiz dərəcələrinin dəyişdirilməsinə ehtiyatlı yanaşmanın vacibliyini vurğulayıblar. Bu müzakirələr süni intellekt sektorunda sürətli investisiya artımının artıq yalnız texnoloji deyil, həm də makroiqtisadi məsələ kimi qiymətləndirildiyini göstərir.