22 rayonda buğda istehsalına yeni subsidiya mexanizmləri hazırlanıb


Ana SəhifəBİZNES22 rayonda buğda istehsalına yeni subsidiya mexanizmləri hazırlanıb
BİZNES20.11.2026 15:29
12
Fins.az - Ölkədə ərzaqlıq buğda istehsalının artırılması və yerli istehsal hesabına daxili tələbatın daha böyük hissəsinin ödənilməsi məqsədilə 22 ixtisaslaşmış rayon üçün yeni subsidiya mexanizmləri hazırlanıb.
Bu barədə kənd təsərrüfatı nazirinin müavini Seymur Səfərli Bakıda keçirilən “Aqronomiya və bitki sağlamlığı: elmdən praktikaya” konfransında məlumat verib.
Onun sözlərinə görə, hazırda ölkənin ərzaqlıq buğdaya olan tələbatının təxminən 55 faizi yerli istehsal hesabına təmin edilir. Yeni proqram çərçivəsində bu göstəricinin 65-70 faizə çatdırılması nəzərdə tutulur.
Həmçinin buğda üzrə məhsuldarlığın hər hektardan 50 sentnerə çatdırılması əsas hədəflərdən biridir. Bunun üçün torpaq potensialı yüksək olan 22 rayonda fermerlərə dövlət dəstəyinin yeni mexanizmləri tətbiq ediləcək.
Təsdiqlənmiş subsidiya qaydalarına əsasən, həmin ixtisaslaşmış rayonlarda müasir suvarma sistemlərindən istifadə etməklə buğda əkən fermerlərə hər hektara 400 manat subsidiya ödəniləcək. Ənənəvi suvarma və dəmyə üsulu ilə aparılan əkinlər üçün isə bu məbləğ 200 manat müəyyən edilib.
Yeni mexanizmlər 2026-2030-cu illəri əhatə edən Dövlət Proqramı çərçivəsində həyata keçirilir.
Rəsmilərin fikrincə, kənd təsərrüfatında istehsalın artırılması üçün əsas istiqamət əkin sahələrini genişləndirməkdən daha çox mövcud torpaqlarda məhsuldarlığı yüksəltməkdir.
Gözlənilir ki, yeni subsidiya mexanizmləri fermerlərin müasir texnologiyalardan istifadəsini stimullaşdıracaq, yerli buğda istehsalını artıracaq və ölkənin ərzaq təhlükəsizliyinin gücləndirilməsinə töhfə verəcək.
MüəllifVüqar
Yüklənir...