Yeni Azərbaycan Partiyasının yaranması müasir dövlətçilik tariximizin mühüm hadisəsidir


Azərbaycanın müasir siyasi tarixində elə hadisələr var ki, onların əhəmiyyəti yalnız baş verdiyi dövrlə məhdudlaşmır, sonrakı inkişaf mərhələlərinə də öz təsirini göstərir. 1992-ci il noyabrın 21-də Yeni Azərbaycan Partiyasının (YAP) təsis konfransının keçirilməsi məhz belə tarixi hadisələrdən biridir.
1990-cı illərin əvvəllərində Azərbaycan mürəkkəb siyasi, iqtisadi və hərbi böhranla üz-üzə qalmışdı. Dövlət müstəqilliyinin yenicə bərpa olunduğu bir vaxtda ölkədə hökm sürən siyasi qarşıdurma, hakimiyyət böhranı, idarəetmədəki səriştəsizlik və Ermənistanın hərbi təcavüzü dövlətçiliyimizi ciddi təhlükə qarşısında qoymuşdu. Belə bir şəraitdə Azərbaycanın gələcəyini düşünən ziyalılar, nüfuzlu ictimai-siyasi xadimlər ölkəni mövcud böhrandan çıxara biləcək yeni siyasi qüvvənin yaradılması zərurətini irəli sürdülər.
1992-ci il oktyabrın 16-da Azərbaycanın 91 nəfər tanınmış ziyalısı Ümummilli Lider Heydər Əliyevə, “Səs” qəzeti vasitəsilə müraciət edərək yeni siyasi partiyanın yaradılmasına rəhbərlik etməsini xahiş etdi. Ulu Öndər oktyabrın 24-də həmin müraciətə cavabında Yeni Azərbaycan Partiyasının yaradılmasının tarixi zərurətdən doğduğunu bildirdi və bu prosesdə fəal iştirak etməyə hazır olduğunu bəyan etdi.
Beləliklə, 1992-ci il noyabrın 21-də Naxçıvan şəhərində, Cəlil Məmmədquluzadə adına Naxçıvan Dövlət Dram Teatrında Yeni Azərbaycan Partiyasının təsis konfransı keçirildi. Azərbaycanın müxtəlif bölgələrini təmsil edən 550-dən artıq nümayəndənin iştirak etdiyi konfransda partiyanın yaradılması haqqında qərar qəbul edildi, Proqram və Nizamnaməsi təsdiqləndi. Ümummilli Lider Heydər Əliyev yekdilliklə partiyanın Sədri seçildi.
Bu hadisə sadəcə yeni siyasi təşkilatın yaranması deyildi. Bu, ölkənin gələcəyinə dair məsuliyyətin öz üzərinə götürülməsi, milli həmrəyliyin və dövlətçilik mənafelərinin ön plana çəkilməsi idi. YAP-ın yaranması Azərbaycanın siyasi həyatında yeni mərhələnin başlanğıcını qoydu.
1993-cü ilin iyununda xalqın təkidli tələbi ilə Heydər Əliyevin siyasi hakimiyyətə qayıdışı ölkəmizin tarixində taleyüklü dönüş nöqtəsinə çevrildi. Ulu Öndərin rəhbərliyi ilə dövlət müstəqilliyinin qorunması, ictimai-siyasi sabitliyin təmin edilməsi, hüquqi dövlət quruculuğunun və iqtisadi islahatların həyata keçirilməsi istiqamətində mühüm addımlar atıldı. Yeni Azərbaycan Partiyası da bu proseslərdə siyasi təşkilat kimi öz fəaliyyətini genişləndirdi.
Ulu Öndər Heydər Əliyevin müəyyənləşdirdiyi dövlətçilik strategiyası bu gün Prezident, Yeni Azərbaycan Partiyasının Sədri İlham Əliyev tərəfindən müasir dövrün çağırışlarına uyğun şəkildə davam etdirilir. Azərbaycanın əldə etdiyi siyasi, iqtisadi və sosial nailiyyətlər, beynəlxalq mövqelərinin möhkəmlənməsi, ərazi bütövlüyünün və suverenliyinin tam bərpası ölkənin inkişaf yolunda yeni mərhələnin əsasını təşkil edir.
Bu gün Yeni Azərbaycan Partiyası öz fəaliyyətini müstəqil dövlətçiliyin qorunması, milli maraqların müdafiəsi, ictimai-siyasi sabitliyin möhkəmləndirilməsi və ölkənin davamlı inkişafı istiqamətində davam etdirir. Partiyanın sıralarında birləşən müxtəlif nəsillərin nümayəndələri qarşıya qoyulan vəzifələrin həyata keçirilməsində iştirak edir, xüsusilə gənclərin ictimai-siyasi fəallığının artırılmasına diqqət yetirirlər.
21 noyabr tarixi həm də YAP-ın keçdiyi inkişaf yoluna nəzər salmaq, əldə olunan nəticələri dəyərləndirmək və qarşıdakı vəzifələri müəyyənləşdirmək baxımından əlamətdardır. Bu tarix Azərbaycanın mürəkkəb tarixi şəraitində milli məsuliyyət nümayiş etdirən insanların bir araya gəlməsinin, siyasi iradənin və təşkilatlanmanın nümunəsidir.
Yeni Azərbaycan Partiyasının yaranmasının əsasında dayanan milli birlik, dövlətçilik, azərbaycançılıq və müstəqillik ideyaları bu gün də onun fəaliyyətinin əsas istiqamətlərini təşkil edir. 1992-ci il noyabrın 21-də atılan tarixi addım Azərbaycanın müasir siyasi tarixində özünəməxsus yer tutur.
Odur ki, mən də, öz növbəmdə Yeni Azərbaycan Partiyasının bir üzvü kimi, bütün YAP üzvlərini və ümumiyyətlə İlham Əliyev kimi liderimizlə dinc və firavan gələcəyə inanan və irəliləyən Azərbaycan xalqını YAP-ın yaradılmasının 34-cü il dönümü münasibətilə təbrik edirəm.
İlham Quliyev
YAP Yasamal rayon, SOCAR, “Neftqazelmitədqiqatlayihə” institutu üzrə ərazi partiya təşkilatının sədr müavini
Dərc vaxtına görə
Sesqazeti.azoxuduğunuz
Yeni Azərbaycan Partiyasının yaranması müasir dövlətçilik tariximizin mühüm hadisəsidir