Xalqa layiqli xidmət nümunəsi

4 dəq oxu
Xəbər
19 noyabr 2026 11:04
Meydanəli Yolçiyev YAP Daşkəsən rayon təşkilatının sədri
Azərbaycanın müasir siyasi tarixində özünəməxsus yeri və rolu olan Yeni Azərbaycan Partiyasının (YAP) yaranması dövlətçilik salnaməmizin mühüm hadisələrindən biridir. YAP mürəkkəb tarixi şəraitdə xalqın xilaskar lideri Heydər Əliyevin ətrafında birləşən vətəndaşların iradəsinin, milli həmrəyliyinin və güclü Azərbaycan dövlətçiliyi arzusunun təcəssümü kimi meydana çıxmışdır. Partiyanın yaradılması müstəqilliyin qorunmasına və dövlətçilik ənənələrinin möhkəmləndirilməsinə xidmət edən tarixi zərurət idi.
1990-cı illərin əvvəllərində Azərbaycan ağır siyasi, iqtisadi və sosial böhranla üzləşmişdi. Hakimiyyət böhranı, idarəetmədəki səriştəsizlik, Ermənistanın hərbi təcavüzü və torpaqlarımızın işğalı müstəqil dövlətçiliyimizi ciddi təhlükə qarşısında qoymuşdu. Belə bir şəraitdə ziyalılar və nüfuzlu ictimai-siyasi xadimlər ölkəni böhrandan çıxara biləcək siyasi qüvvənin yaradılması təşəbbüsünü irəli sürdülər. 1992-ci il oktyabrın 16-da 91 nəfər tanınmış ziyalının Ulu Öndər Heydər Əliyevə ünvanladığı müraciət bu prosesin mühüm mərhələsi oldu. Heydər Əliyev müraciətə cavabında Yeni Azərbaycan Partiyasının yaradılmasının obyektiv zərurətdən irəli gəldiyini vurğulayaraq bildirmişdi: “Güman edirəm ki, müstəqil Azərbaycan dövlətinin gələcək həyatının və fəaliyyətinin əsasını təşkil edən demokratiya və siyasi plüralizm şəraitində Sizin müraciətinizdə göstərilən Yeni Azərbaycan Partiyasının yaradılması obyektiv zərurətdən doğur”.
Beləliklə, 1992-ci il noyabrın 21-də Naxçıvanda 550 nəfərlik təşəbbüs qrupunun iştirakı ilə YAP-ın təsis konfransı keçirildi. Partiyanın yaradılması haqqında qərar qəbul edildi, Nizamnamə və Proqram təsdiqləndi, Ulu Öndər Heydər Əliyev yekdilliklə Sədr seçildi. Bu hadisə Azərbaycanın ictimai-siyasi həyatında yeni mərhələnin başlanğıcı oldu.
YAP yarandığı ilk gündən konstruktiv mövqeyi, milli maraqlara əsaslanan fəaliyyəti və dövlətçilik prinsiplərinə sadiqliyi ilə seçildi. Ulu Öndər Heydər Əliyevin siyasi təcrübəsi, uzaqgörənliyi və xalq arasında böyük nüfuzu partiyanın qısa müddətdə ölkənin aparıcı siyasi qüvvəsinə çevrilməsini təmin etdi. 1993-cü ildə Heydər Əliyevin xalqın təkidli tələbi ilə hakimiyyətə qayıdışı Azərbaycanın dövlətçilik tarixində dönüş nöqtəsi oldu. Ölkədə siyasi sabitliyin təmin edilməsi, demokratik ənənələrin inkişafı və iqtisadi tənəzzülün qarşısının alınması istiqamətində mühüm addımlar atıldı. Təsadüfi deyil ki, Ulu Öndər YAP-ı “Dünənin, bu günün və gələcəyin partiyası” adlandırmışdı.
Partiyanın inkişafında 2005-ci il martın 26-da keçirilən III qurultay xüsusi əhəmiyyət daşıyır. Prezident İlham Əliyevin partiyanın Sədri seçilməsi YAP-ın fəaliyyətində yeni mərhələnin başlanğıcı oldu. Ulu Öndərin müəyyənləşdirdiyi siyasi kursun davam etdirilməsi nəticəsində Azərbaycanın beynəlxalq mövqeləri möhkəmləndi, iqtisadi potensialı artdı, genişmiqyaslı sosial-iqtisadi layihələr həyata keçirildi, müdafiə qüdrəti yüksəldi.
Mənbə
1 mənbə



