Səhər baş ağrısı ilə oyanırsınızsa, səbəbi budur


Həkim Ranj Sinqh səhərlər baş ağrısı, yorğunluq və halsızlıqla oyanmağın mümkün səbəblərindən birinin yuxu zamanı dişləri qıcamaq – bruksizm olduğunu açıqlayıb.
Bakıvaxtı.az “Daily Mirror” nəşrinə istinadən xəbər verir ki, mütəxəssis bu vəziyyətin xüsusilə stress, narahatlıq, maliyyə problemləri və soyuq hava səbəbindən yaranan əzələ gərginliyi ilə daha da ağırlaşa biləcəyini bildirib.
Həkimin sözlərinə görə, yuxu zamanı çənənin sıxılması və baş nahiyəsinə qədər uzanan əzələlərin gərginləşməsi baş ağrılarına səbəb olur.
Ranj Sinqh bruksizmin digər əlamətlərinin də olduğunu bildirib. Bunlara dişlərin və plombların zədələnməsi, yanaqların və dilin daxili səthində diş izlərinin yaranması, çənə ağrısı, eləcə də yuxu zamanı eşidilən xarakterik diş qıcama səsi daxildir.
Mütəxəssis bruksizmdən şübhələnən şəxsləri həkimə müraciət etməyə çağırıb. Onun sözlərinə görə, problemə laqeyd yanaşmaq temporomandibulyar oynağın zədələnməsinə gətirib çıxara bilər. Bu zaman çənədə, qulaqda və gicgahlarda ağrı, çənəni hərəkət etdirərkən çırtlama səsi, ağzı açmaqda çətinlik və müvəqqəti çənə kilidlənməsi müşahidə oluna bilər.
Murad İsmayıl
