“Mən Allaha ibadət edə biləcəyim bir yerə sahib olmaq istəyirəm”


Amerikalı tibb bacısı öz şəhərinin sakinləri ilə danışıb...
...17 il ərzində qurbanların həyatını xilas edən amerikalı tibb bacısı Cаstis Medrano heç vaxt onların dəri rəngi və ya dini haqqında düşünməmişdi.
Lakin yaşadığı şəhərdə məscid tikintisini müzakirə etmək üçün toplaşan sakinlərin qarşısına ilk dəfə öz inancından danışmağa və müsəlmanların namaz qılmaq üçün yerə niyə ehtiyac duyduğunu qonşularına izah etməyə məcbur olub. Sevdiklərini dolandırmaq üçün eyni anda üç işdə çalışan ailənin anası Corciya ştatının Loqanvil Şəhər Şurasının iclasında çıxış edib.
SİA-nın əldə etdiyi məlumata görə, yüzlərlə sakin məscidin və İslam mərkəzinin tikintisi layihəsini müzakirə etmək üçün toplaşıb.
Həm tikinti prosedurlarına, həm də şəhərdə müsəlmanların olmasına etiraz olaraq, o, həyatı haqqında danışıb və sonra sosial mediada sürətlə yayılan sözlərlə istəyini ifadə edib.
Tibb bacısı qərəzlərə qarşı...
...12 il əvvəl İslamı qəbul edən meksikalı amerikalı Medrano daha əvvəl bu qədər nifrət, dözümsüzlük və irqçiliklə üzləşmədiyini deyib.
Nə demək istədiyini izah edən qadın gündəlik peşə təcrübəsinə - avtomobil qəzaları, atışma və hücumların qurbanları ilə işləməyə müraciət olub. Belə anlarda əsas odur ki, qurbanın kimliyindən asılı olmayaraq insan həyatını xilas edəsən.
O, iştirakçılar qarşısındakı şəxsin ağ və ya qəhvəyi, ispan, ərəb və ya asiyalı olmasının onun üçün fərqinin olub-olmadığını soruşub. Medrano, köməyə ehtiyacı olanlardan heç vaxt dini və ya mənşəyi barədə soruşmadığını vurğulayıb. Bu dəfə o, təkcə öz ibadət yeri hüququnu müdafiə edən bir müsəlman qadın kimi deyil, həm də uzun illər ərzində bəzi üzvləri məscidin tikintisinə qarşı çıxan icmaya xidmət etmiş feldşer kimi danışıb.
O, arzusunu bu sözlərlə dilə gətirib: “Sadəcə yerim olsun ki, gəlib diz çöküb, alnımı yerə qoyub: “Allahım, səni sevirəm, Allahu əkbər!” deyim”.
Sakinlər arasında fikir ayrılığına səbəb olan layihə...
Sözügedən layihə Loqanvildə Li Bird Yolu üzərində yerləşən məscid və İslam təhsil mərkəzi layihəsidir. Kompleksin sahəsi təxminən 20 min kvadrat fut (təxminən 1858 kvadratmetr) olmalıdır.
“Fox 5 Atlanta”nın məlumatına görə, şəhər şurasının iclasında yüzlərlə sakin iştirak edib. Onlar layihənin təsdiqi prosesi ilə bağlı etiraz və suallar qaldırıb, həmçinin tikinti işlərinin guya lazımi icazələr alınmadan və layihəyə şəhər şurası tərəfindən baxılmadan başladığını bildiriblər.
Belə ki, bəzi iddialar sırf lisenziyalaşdırma və tikinti prosedurlarına əməl olunması ilə bağlı olub ki, bu da özlüyündə pozuntuların olmasını göstərmir.
Lakin bəzi çıxışlar tikinti və şəhərsalma məsələlərindən kənara çıxıb, şəhərdə İslam mərkəzinin yaranmasına etirazlara keçib.
İştirakçılardan biri ABŞ-ın xristian prinsipləri üzərində qurulduğunu bildirib və bəzi yeni gələnlərin Amerika cəmiyyətinə inteqrasiya olmaq istəməməsini tənqid edib. Digər çıxış edənlər də öz növbəsində müsəlmanları Amerika cəmiyyətində kənar kimi təsvir etmək cəhdlərini rədd ediblər. İştirakçılardan biri ABŞ-da anadan olduğunu və Amerika dəyərlərini bölüşdüyünü vurğulayıb.
Cаstis Medrano sadə və aydın bir xahişlə çıxış edib: müsəlmanları səcdə etmək üçün yerlə təmin etmək.
Uzun illər tibb bacısı kimi çalışdığını, üç iş yerini və ailə qurmaq məsuliyyətini təsvir etdikdən sonra, o, toplananları İslamı qəbul etməyə çağırmayıb. O, sadəcə müsəlmanların inanclarını tətbiq etmək üçün bir yerə sahib olmaq hüququnun qəbul edilməsini istəyib.
Əli Babayev
