Böyük Britaniyanın ilk H-47ER “Chinook” helikopteri sınaq uçuşunu həyata keçirib


“Boeing” şirkətinin hazırladığı yeni helikopter yüksək riskli xüsusi əməliyyatlar üçün nəzərdə tutulan imkanlarla təchiz edilib.
Ordu.az xəbər verir ki, bu barədə “Boeing UK” şirkəti məlumat yayıb.
“Boeing” Böyük Britaniyanın yeni H-47ER “Chinook” helikopterinin ilk uçuşunu həyata keçirib. Bu hadisə ölkənin uzaqmənzilli xüsusi əməliyyat imkanlarının genişləndirilməsi istiqamətində mühüm mərhələ hesab olunur.
2026-cı il noyabrın 13-də yayılan açıqlamada “Boeing UK” şirkəti helikopterin Pensilvaniya ştatının Filadelfiya şəhərində sınaq uçuşuna başladığını bildirib. Təyyarə qabaqcıl Aktiv Paralel İdarəedici Sistem - APAS ilə təchiz olunub.
Bu texnologiyanın uçuş idarəetməsini yaxşılaşdıracağı, pilotların iş yükünü azaldacağı və mürəkkəb tapşırıqlar zamanı helikopterin effektivliyini artıracağı gözlənilir.
İlk uçuş Böyük Britaniyaya 14 ədəd H-47ER “Chinook” helikopterinin tədarükü proqramında mühüm mərhələdir. Böyük Britaniya “Chinook Block II” konfiqurasiyasının ilk beynəlxalq istifadəçisi olacaq.
Bu mərhələdən əvvəl 2026-cı ilin iyulunda “Boeing UK” şirkəti Filadelfiyadakı müəssisədə istehsal edilən ilk genişləndirilmiş mənzilli helikopterin fotolarını yayımlamışdı.
Yeni helikopterlər Kral Hərbi Hava Qüvvələrinin uzaqmənzilli ağır yükdaşıma və xüsusi əməliyyat imkanlarını gücləndirməyə xidmət edəcək.
Sevinc Əliyeva Ordu.az
1 mənbə
