Avropa İttifaqı investisiya fondları üçün yeni qaydalar hazırlayıb


Avropa İttifaqı ekoloji və sosial meyarları əsas götürən maliyyə məhsulları üçün açıqlama qaydalarını sadələşdirmək barədə razılığa gəlib. Yeni yanaşma investorların müxtəlif fondları müqayisə etməsini asanlaşdırmaq və maliyyə bazarında şəffaflığı artırmaq məqsədi daşıyır.
Plat.az Avropa İttifaqı Şurasının məlumatına istinadən xəbər verir ki, noyabrın 19-da Avropa Parlamenti və üzv dövlətlər davamlı maliyyə məhsullarının açıqlanması qaydalarına yenidən baxılması barədə ilkin razılıq əldə ediblər. Yeni sistemdə maliyyə məhsullarının üç kateqoriyaya – davamlı, keçid və əsas ESG meyarlarına uyğun məhsullara bölünməsi nəzərdə tutulur. Bu təsnifat investorların vəsaitlərini hansı istiqamətə yönəltdiyini daha aydın qiymətləndirməsinə imkan verməlidir. Razılaşma maliyyə iştirakçılarının inzibati yükünün azaldılmasını və hesabat tələblərinin daha məqsədyönlü qurulmasını da əhatə edir. Yeni mexanizmin tətbiqi investisiya fondlarının fəaliyyətinə, eləcə də Avropada yaşıl maliyyələşmənin inkişafına təsir göstərə bilər. Sənədin texniki tamamlanması və rəsmi təsdiqi növbəti mərhələdə həyata keçirilməlidir.